Erabakitzeko eskubidea "demokrazia" auzia dela nabarmenduz aurkeztu du koalizioak martxoaren 7ko ekitaldia. 10.000 lagun batu nahi ditu EH Bilduk Barakaldon; "10.000 konpromiso pertsonal erabakitzeko eskubidearen alde".
Asier Vega EH Bilduko Bizkaiko batzarkideak nabarmendu du "Euskal Bidea abiatzeko eta demokrazia Euskal Herrira ekartzeko garaia" dela, eta erantsi erabakitzeko eskubidea ez dela abertzaleen kontua, "demokrazia, justizia soziala, eredu politiko eta sozialaren aldaketa eta eredu propioa eraikitzekoa" baizik.
"Urratsez urrats, erabakiz erabaki" abiatu nahi du koalizioak, "inori baimenik eskatu gabe". Urtarrilaren 24an aurkeztu zuten Euskal Bidea proposamena EH Bilduk eta EH Baik, eta, hura gizarteratzeko, 100.000 kafeegitasmoa abiatu zuten.
