Erabakitzeko eskubidearen alde diren indarrekin akordiora iristeko prest agertu da Aralar

Gipuzkoako Batzar Nagusietako politika orokorreko osoko bilkuraren bigarren egunean, Rebeka Ubera Aralarreko batzarkideak Markel Olano ahaldun nagusiari aipatu dio, «independentista izan zein ez», erabakitzeko eskubidea aldarrikapen demokratikoa dela eta hori onartzen duten alderdiekin akordioa lortzeko prest dagoela. Gernikako itunean ez egotea aurpegiratu dio, eta Gipuzkoako EAJk asteburuan aurkeztutako Batu Gaitezen ekimenak hauteskunde kutsua izatea kritikatu du. Olanok erantzun du EAJk bere bidea egingo duela, eta ez duela ulertzen Aralar alderdia zergatik dagoen «deseroso» proposamen horrekin. PSEko eledun Julio Astudillok, berriz, «obsesio abertzalea» izatea eta aldundia Jaurlaritzari oposizio egiteko baliatzea egotzi dio Olanori.