Iruñeko Sanduzelaiko jai batzordeak jakinarazi duenez, bi gizonezko gaztek eraso homofoboa salatu dute, bart gauean. Auzoko festetan "marikoiak" oihukatu dietela adierazi dute, eta elkarretaratzera deitu dute 20:00etarako.
Auzoan era horretako erasorik ez dela onartuko adierazi dute.
Horrez gain, tabernariei eskatu diete lokalak itxi ditzatela 20:00etatik 20:15era, protestarekin bat egiteko.
Iruñeko Udalak ere berehala gaitzetsi du erasoa, eta adierazpen bat onartu du Geroa Bai, EH Bildu, PSN, Aranzadi eta Ezkerraren aldeko bozekin. UPN abstenitu egin da. Adierazpen horretan, udalak "babesa" agertu die biktimei, eta inoiz haien sexu joerarengatik "jazarriak sentitu diren guztiei".
Udalak bere konpromisoa berretsi du "sexu eta genero aniztasunarekin zerikusia duten erasoak desagerrarazteko, baita LGTBI komunitatearen segurtasuna hiriko esparru guztietan hobetzeko ere".
Udalak "maskulinitate menperatzailea" ezartzen dituen "eredu heteropatriarkala" aldatzeko beharra azpimarratu du. Eredu horrek "erasotzailea babestu" eta erasoa jasan dutenak "erruduntzat" jotzen dituela ohartarazi du, "derosoak zaizkien jokabideak eta jazarpena" onartzera exijituz, "festaren edo ohituren aitzakian".
Udalak herritarrei eskatu die ez ditzatela halako gertaerak oharkabean pasatzen utzi.
