Datorren astean hasiko dira Baionako bestak. Bost egunetan milioi bat lagun baino gehiago joan ohi da Lapurdiko hiriburura; eta jendetzaren artean urtero-urtero errepikatzen diren erasoak gertatzen dira. “Badakigu: Baionako bestak mota askotako eraso sexisten gunea dira maleruski”, ohartarazi du PAFek, Alternatiba Feminista Bategatik elkarteak.
Bigarren urtez jarraian, norbanako eta elkarteak biltzen dituen kolektiboak (PAF, Baionako Gazte Asanblada, Point 8, Aitzina, IPEH Antifaxista, Bortizkeria Sexisten Aurkako Kolektiboa) jarrera horiek ukatzeko borondatea erakutsiko du, besten garaian Baionako karrikak banderolaz apainduz, arazoaz ohartarazteko.
Ostatuei kartelak banatuko dizkiete Ostatu honetan ez dugu jarrera sexistarik onartzen. Gozatu elkar errespetatuz! leloarekin, eta ekintza hauetan parte hartzeko, eurekin harremanetan jartzeko gonbita egin dute.
Sanferminetan inspiratuak diren besta hauen atarian, Iruñean bildu zen jendetza elkartu nahi dute emakumearen aurkako erasoei ezetz esateko ahalik eta ozenen: “Iruñeko bestetan bezala, anitz izan gaitezen erraten 'Eraso sexistarik ez!'. Iruñeko sanferminetan lau sexu eraso salatu zituzten guztira. Lokal bateko komunetan egin ziote eraso 19 urteko andrazko bati, eta ehunka lagun bildu zen Gora Iruñea-k eta Indarkeria Sexistaren Kontrako Emakumeen Plataformak deitutako elkarretaratzean.
