Duela 50.000 urtekoak dira arrastoak. Garai hartan bi giza espezieren artean izandako harremanetatik jaio zen emakumezko baten aztarnak dira Siberiako lurretan aurkitutakoak. Emakumezko neanderthal baten eta gizon denisovar baten arteko nahasketa da, eta 13 urte zituen hil zenean.
"Lehendik ere bagenekin bi espezie horiek harremanak izaten zituztela tarteka, eta baita seme-alabak ere. Baina orain arte ez genuen topatu halako aztarnarik", azaldu dute Leipzigeko (Alemania) Eboluzioaren Antropologiaren Max Planck Institutuko ikerlariek. Institutu horretako talde batek aurkitu du.
Duela 40.000 urte arte Eurasian bizi izan ziren bi espezie horiek: neanderthalak mendebaldean eta denisovarrak ekialdean. "Gutxitan egiten zuten topo, baina, aurkitzen zirenean, ohikoa zen harremanak izatea", adierazi du aldeko kide Svante Paabok.
Ikertzaileek azaldu dutenez, gaur egun jatorri afrikarrekoak ez diren ia gizaki guztiek dituzte DNAn neanderthalen aztarnak, eta haietako batzuek baita Asian bizi izan ziren denisovarrenak ere. "Horrek frogatzen du harremanetan zeudela", dio Paabok. Ordea, gaur arte, Altai mendietako Denisova leizean soilik aurkitu dituzte bi espezieen hezurdurak.
