Ezkerrak jarri zuen Nafarroako euskararen legea aldatzeko aukera mahai gainean, eta PSNren zuzendaritza batzordeak aukera horri baiezkoa eman eta gero, proposamen bat lantzeari ekin diote sozialistek, bertze taldeei aurkeztu eta haiekin negoziatzeko. Horixe erran du Pedro Rascon parlamentari sozialistak.
Ez du eperik zehaztu. "Gutxieneko ikasle kopurua zehazteko formula egokia bilatzen ari gara", azaldu du. Rasconek erran du presarik ez dela. "Legea ohiko prozeduraren bidez tramitatzea da asmoa; aste honetan aurkezten ez badugu gure proposamena, hurrengoan aurkeztuko dugu; horrek ez du deus aldatuko". Xedea da betiere legegintzaldia amaitu baino lehen egitea aldaketa, hurrengo ikasturtean jada D eredua eremu ez-euskaldunean ezarri ahal izateko.
Sozialistak argi utzi du haien proposamenaren bidez asmoa dela eremu ez-euskaldunean D eredua ezartzea, eta, horrekin batera, eremu euskaldunean gaztelaniaz ikasi nahi dutenei ere hori egin dezaten bidea bermatzea. "Gutxieneko kopuruak, beraz, bi aldeetan ezartzea da helburua". Erantsi du legeak, egun dagoen bezala, ez duela eremu ez-euskaldunean euskaraz ikasteko aukera debekatzen. "Gobernuaren borondaterik ezak itxi du bide hori".
