Espainiako Gobernuak Ertzaintzaren 26. promozioaren lan eskaintza publikorako deialdia errekurritu du. 250 ertzain aukeratu dituzte promozio horretan, baina oraindik lanean hasi gabe daude. 25. promozioko lan deialdia ere errekurritu zuen Espainiak, eta haren inguruko erabakia emateke dago oraindik. EAEko Auzitegi Nagusiak eman behar du promozio horretako 254 agenteri eragingo dien epaia.
Gaur jakin da bigarren errekurtsoaren berri, eta Josu Erkoreka Jaurlaritzako bozeramaileak gobernu bileraren ostean salatu du "onartezina" dela Espainiako Gobernuaren jarrera, eta Ertzaintzarekin "obsesionatuta" egotea aurpegiratu dio Espainiari.
