Arnaldo Otegi EH Bilduko lehendakarigaiaren balizko inhabilitazioa agendaren lehen lerroan kokatu da azken egunetan, Auzitegi Nazionaleko Fiskaltzak ohartarazi eta gero "legea beteko bada" Otegi ezin dela bozetara aurkeztu. Otegik Iñigo Urkullu Eusko Jaurlaritzako jarduneko lehendakariari eskatu zion saihesteko "iruzurra".
Horren aurrean, Eusko Jaurlaritzako jarduneko bozeramaile Josu Erkorekak erantzun du Urkulluk ez duela eskumenik bitartekaritza horretan aritzeko, eta ohartarazi Otegiren egoera ez dela "zerutik erori"; Otegiren "defentsa juridikoak hartutako erabakien ondorio" dela azpimarratu du.
Gaia "ikuspuntu juridikotik konplexua" dela uste du Erkorekak, eta Espainiako Gobernuko jarduneko Justizia ministro Rafael Catala kritikatu du, auzitegiek ebatziko dutena iragarrita, "mespretxua" azaldu diolako botere banaketari: "Akats agerikoa eta botere banaketaren mespretxu eta urratze argia da".
