Usurbilen (Gipuzkoa), Zubietako errauste plantaren aurkako flash mob erraldoia egin zuten atzo, Gipuzkoa Zero Zabor elkarteak deituta. Ehunka lagun elkartu ziren, eta, musikaren erritmoan, errauste plantaren eraikuntza bertan behera uzteko eta hondakinak kudeatzeko beste eredu baten alde egiteko eskatu zieten agintariei.
Lady Gagaren Bad Romance abestia dantzatu zuten Errebote plazan elkartutakoek, Gipuzkoako hainbat herritatik iritsita. Jendea goizean goizetik iritsi zen Usurbilera, eta, dantzan hasi aurretik ere, hainbat ekitaldi izan ziren; besteak beste, Porrotx eta Marimotots pailazoena.
Hainbat astez entseguak izan dira Gipuzkoa osoan, eta atzo azkenean 13:30ean iritsi zen dantzan egiteko unea. Xabier Mikel Errekondo Usurbilgo alkateak errauste planta eraikitzeari uzteko eskatu zuen, eta beste eredu bat posible dela aldarrikatu zuen.
