Erraustegia Erabakia plataformak hamabi herritarrez osatutako berme batzordea aurkeztu du gaur Usurbilen (Gipuzkoa). Batzordearen zeregina galdeketaren prozesu osoa ikuskatzea eta protokoloak ezartzen duenaren arabera betetzen dela bermatzea izango da. "Gizarte anitz honen isla da osatu den berme batzordea. Bertan herri honetan erreferentzialtasuna duten elkarteko kide, kirolari, artista, hiritarren parte hartzeko teknikari eta administrazioan, irakaskuntzan eta osasungintzan lanean diharduten pertsonak daude".
Irailaren 30ean, urriaren 1ean eta 2an egitekoak ziren galdeketa, baina Eusko Legebiltzarrerako hauteskundeak irailaren 25era aurreratu zituztenez, galdeketa atzeratzea erabaki zuten.
Izatez, galdeketa antolatzeko udalari eskatu zion Erraustegia Erabakia plataformak, baina Espainiako Gobernuak ez zion baimenik eman egiteko. Horren ondorioz, udalak herritarrei itzuli zien galdeketa egin edo ez erabakitzeko ardura, eta aurrera egitea erabaki zuten.
