Zubietako erraustegiaren eraikuntza eta kudeaketa adjudikatzeko agiriak onartuko dituzte gaur GHK Gipuzkoako Hondakinen Kontsortzioaren batzarrean. EAJk eta PSE-EEk gehiengoa dutenez, aurrera egingo du proiektuak, eta xehetasunak atzo azaldu zituzten Markel Olano Ahaldun nagusiak eta Jose Ignacio Asensio Ingurumen diputatuak, prentsaurrekoan.
Asensiok, GHKren batzarraren ostean, adierazi du onartu egin direla erraustegia eraiki eta kudeatzeko adjudikazio agiriak, espero bezala: botoen %90 alde, eta %10 kontra (ordezkari guztiak joan dira bilerara). Jakinarazi duenez, Tolosaldeko mankomunitatea eta Urola Erdiko mankomunitatea izan dira aurka bozkatu dutenak. Asensioren arabera, "normaltasun osoz" hartu dituztela orain arteko erabaki guztiak: "Gipuzkoarrekin dugun konpromisoari erantzuteko gaude hemen: urtebeteko lanaren ostean, adjudikazioa martxan da". Atzo bezala, gaur ere nabarmendu du hondakinen tratamenduaren auziari "behin betiko konponbidea" eman dietela, eta 2019ko udarako erraustegia lanean hasteko prest egotea espero dutela. "Horri gehituta Gipuzkoan ditugun gaikako bilketaren eta birziklapen tasak, Europako herrialde aurreratuenen abangoardian sartuko gaitu [erraustegiak]".
Errausketa plantaren kontrakoak, baina, ez daude ixilik egoteko. Errausketaren kontrako mugimenduaren deiari kasu eginez, jende asko bildu da Diputazioaren aurrean, eta 19:00etarako ere batzarrerako deia egin du Gipuzkoa Zutik-ek.
Aitor Bereziartua Urola Erdiko mankomunitateko presidenteak (EH Bildu) bilerara sartu aurretik hitz egin du, eta EAJren eta PSE-EEren jarrera salatu du. Gainera, jakinarazi du maiatzaren 6ko batzarrari jarritako helegitea tramiterako onartu dietela. Forma akatsengatik jarri zuten helegitea, eta bilera hartan bideragarritasun ekonomikoaren inguruko txostena onartu zuten. Helegitea azkeneraino joango balitz, bilera hartan hartutako erabakiak bertan behera geldituko lirake.
Asensiok, helegite horren inguruan galdetuta, esan du oraindik ikusteko dagoen arren zein izango den epailearen erabakia, "normaltasun osoz" eta "estatutuak errespetatuz" egin dituztela tramite guztiak: "Erabakiak ondo hartuta daudela uste dugu".
