Errazti: "Estatutua agortuta dago, eta euskal gizarteak marko hori gainditzeko eskaera egin du"

Arnaldo Otegi Batasuneko bozeramaileak igandeko manifestazioan egindako adierazpenak ere hizpide izan ditu Erraztik. "ETAk 1977an egin zuen proposamenari EAJk muzin egin ez balio, gaur egun ez litzateke hildakorik eta bonbarik izango", esan zuen Otegik, "eta gauzak denboran atzera eginez ezin direla justifikatu eta ezin direla estrapolatu" adieraziz erantzun dio Erraztik. "Batasunak bere posizio politikoa argitu behar du eta independentzia politikoarekin jokatu, euskal gizarteak ETAri eskatzen diona berak ere exijituz".

'No apartheid. Autodeterminazioa' lemapean egindako manifestazioaz eta debekuetaz ere hitz egin du Erraztik. "Nire ustez manifestazioak baimendu egin behar dira, betiere, argi baldin badago gizarteari eragingo ez dioten istilurik ez direla sortuko", azpimarratu du. EAEko Justizia Auzitegi Nagusiaren erabakia zuzena izan dela esan du EAko presidenteak, eta hortik sortu denguztia "udako ohiko erreakzioak" direla esan du.

EAEko Justizia Auzitegi Nagusiaren azken epaiak "alderdien baliogabetzeak ez dio alderdikideen eskubideari eragiten" jasotzen du, eta Erraztiren arabera, PPk egiten duena pluralitatea sistematikoki desagertarazteko nahia dela nabarmendu du.

Hala, Espainiako Auzitegi Gorenaren eta Fiskaltzaren independentzia eza salatu du Eusko Alkartasuneko buruak. "Demokrazia batean demokrazia indartu egin beharra dago behin eta berriz, eta ez hustu, eta hori da PPko Gobernuak egiten duena. PPri ez zaio gustatzen modelo demokratiko hau, eta ez dago darabilen hizkuntza neofrankista hori ikusi besterik", azpimarratu du.