Bizkaiko hiriburuan saldu dute Erregeetako loteriaren lehen saria jaso duen zenbakia. 5.685 zenbakiari egokitu zaio, eta Deustuan saldu dute osorik, 19 zenbakidun loteria administrazioan.
Serie bakoitzeko, bi milioi euroko saria jasoko dute zenbakiaren jabeek. Dezimo bakoitzari 200.000 euroko saria dagokio. Guztira, 100 milioi euro banatu dira Bilbon. Horietatik, 26 Arangoiti auzoko Ziortza tabernak banatu ditu, jabeak 123 dezimo saridun erosi baitzituen Deustuan, ondoren tabernan saltzeko.
Horrez gain, bigarren sariaren zati bat Gasteizera, Anoetara (Gipuzkoa), Eibarrera (Gipuzkoa) eta Cordovillara (Nafarroa) joan da. 18.442 zenbakiari egokitu zaio. Gasteizko Alde Zaharrean saldu dituzte dezimo batzuk, Ayala Kantzilerra 7 helbidean; Anoetan, San Juan kaleko 6 zenbakian saldu dira beste batzuk; Eibarren, Errebal kaleko 15.ean, eta Cordovillan, La Morea merkataritza zentroko loteria saltokian. Serie bakoitzeko 750.000 euro jasoko dituzte zenbakiaren jabeek.
