Ertzain gutxiagok zainduko dituzte bozkalekuak

Eusko Jaurlaritzako Herrizaingo Sailak aurreko hauteskundeetan baino ertzain gutxiago jarriko ditu bozkalekuak zaintzen, kale indarkeriako ekintzak desagertu egin direlako. Herrizaingo Saileko iturriek Efe agentziari baieztatu diotenez, «ertzainen presentzia egokitu» egingo dute «ETAk indarkeria uztea erabaki ondoren sortu den egoera berria dela medio». Kopuru zehatzik aipatu ez arren, bozen zaintzarako prestatutako taldea «malguagoa» izango da, «baina ez hauteskunde egunean segurtasuna bermatzeko inolako eragozpenik gabe». Iragan maiatzeko udal eta foru hauteskundeetan, Herrizaingo Sailak 5.700 ertzain moblizatu zituen EAEko 499 bozkalekuak zaintzeko.