Erreskate zerbitzuek miaketa lanak amaitu dituzte Urrunagako urtegian, eta ez dute aurkitu informazio baliotsurik Jon Barcenaren desagertzearekin lotuta. 19 urteko gaztearen bila ari da Ertzaintza, joan den igandean Gorbeian mendian galdu zenetik.
Barcenaren zenbait objektu pertsonal —diru zorro bat eta giltza batzuk— topatu zituen poliziak asteazkenean Legution (Araba), Urrunagako urtegiaren inguruan. Horrez gain, galdu zen egunean soinean zeramatzan jantzi batzuk aurkitu zituen, atzo, handik gertu.
Inguru horretan miaketa lanak amaituta, ikerketa lanarekin jarraituko du Ertzaintzak Barcenaren desagertzearekin lotutako zantzu gehiagoren bila. Gaztearen objektu pertsonalak aurkitu ziren inguruko ur azalaren behaketa lanei ere eutsiko die.
