Gaur goizean Ertzaintzak eta Bilboko udaltzainek Arriagan plazan geratzen ziren haserretuak bota dituzte. Udalak berak jakinarazi duenez, 06:30ean joan dira poliziak, eta 69 lagun identifikatu eta plazatik joatera behartu dituzte. Gehienak etorkinak direla azpimarratu du Udalak.
30 udaltzainek hartu dute parte operazioan, Ertzaintzak lagunduta. Ondoren garbitzaileak joan eta kanpatuta zeuden lekua garbitu dute. Udalak dio 18.000 kilo eraman dituztela, eta inguruan zeuden pintaketak ezabatu dituztela.
M-15 mugimenduko bozeramaileek argitu dute Arriagan kanpatuta geratzen zirenak baztertze egoeran dauden pertsonak direla. Zentzu horretan salatu dute, udal politikek ez dutela baztertze egoeran dauden pertsonen errealitatea konpontzeko ezer egiten, alderantziz, horretarako beharrezko baliabideak oztopatzen dituzte.
Esan dute "ezustean" harrapatu dituela kanporatzeak, eta gaur arratsaldean batzarrean eztabaidatuko dutela gertatutakoaz. Udalari leporatu diote aurretik ezer esan ez izana, eta jakinarazi dute Bilboko konpartsekin hitzartuta zutela Aste Nagusirako plaza hutsik uztea txosnak jarri ahal izateko, eta Udalak bazekiela hori.
