Ertzaintzak gizon bat atxilotu du Donostian, hiru emakume jotzea leporatuta

Ertzaintzak 28 urteko gizon bat atxilotu du Donostian, hiru emakume jo dituelakoan. Eusko Jaurlaritzako Herrizaingo Sailak jakinarazi duenez, igandean gertatu zen erasoa, 07:00 aldera. Gizonezkoa ihes egiten saiatu zen, baina ertzainak atzetik joan eta gizona preso hartu zuten. Hiru andreetatik bi Donostia Ospitalera eraman zituzten: batek kolpe handia zuen aurpegian; besteak, berriz, sudurra apurtuta izan zezakeelakoan eraman zuten erietxera.

Ertzaintzak bost gizonezko atxilotu ditu igandeaz geroztik, genero indarkeriarekin lotutako delituengatik. Igandean, 30 urteko pertsona bat atzeman zuen Bilboko Uribarri auzoan, bikotekideari sukaldeko labana batekin eraso ziolakoan. Emakumea etxeko atarian zegoen odoletan. Bilboko osasun etxe batera eraman zuten andrea, zauriak artatzera. Herrizaingo Sailaren arabera, bikotea etxean zegoen hainbat lagunekin, gizon-emakumeak eztabaidan hasi zirenean. Orduan, gizona andreari oldartu zitzaion. Erasoa saihesten ahalegindu zen emakumea, baina eskuan eta masailean sastakatu zuen gizonak.

Barakaldon 36 urteko gizon bat atxilotu zuen Ertzaintzak igande goizean, bikotekideari ustez ukabilkada bat emateagatik. Udalerri horretako Florida kalean gertatu zen erasoa. Jasotako kolpearen ondorioz, emakumea erori eta lurraren kontra jo zuen burua. Konortea galtzekotan egon zen andrea, eta erietxera eraman zuten.

Sexu erasoak

Emakumeen kontrako sexu erasoak egin dituztelakoan, bi gizon atxilotu zituen Ertzaintzak herenegun. Igande arratsaldean 37 urteko gizonezko bat atzeman zuten ertzainek Irunen (Gipuzkoa); urtarrilaren 9an emakume bati sexu ukituak egitea leporatzen diote. Bestea Zornotzan (Bizkaia) eraman zuten preso. 05:30 aldera atxilotu zuten 29 urteko gizonezkoa, herri horretako taberna batean emakume bati oldartu eta sexu ukitu ugari egin zizkiolakoan.