Segi gazte erakundearen aurka Espainiako Auzitegi Nazionalean hasitako epaiketari planto egin dioten Goizane Pinero eta Unai Ruiz auzipetuen senide eta lagunek elkarretaratzea egin dute gaur goizean Gasteizen.Bilkurarekin salatu nahi izan dute azken egunotan bi gazteen hainbat senide eta lagunek Ertzaintzaren "jazarpena" pairatu dutela. Etxe aurrean ertzaintzaren hainbat patruila egun osoz izan dituztela eta identifikatu egin dituztela jakinarazi dute. "Beldurraren bitartez dinamika desobedientearekin amaitu nahi dute", salatu dute elkarretaratzean.
Bi gazteei elkartasuna adierazteko asmoz, erroldatze masiboa egin dute Gasteizko Udaletxearen bulegoan, modu sinbolikoan. "Gure etxeak eta bihotzak zabaldu nahi dizkiegu, babesa adierazteko". Ertzain ugari izan dira elkarretaratzea gertutik zaintzen, baina arazorik ez dute izan bildutakoek udaletxearen bulegoetara sartzeko.
