Eskola publikoetako autobusetan eta jolastokian zaintzan aritzen diren langileek greba dute astelehenean eta asteartean, lan itunaren eske. Eusko Jaurlaritzako Hezkuntza Sailak jakinarazi du gutxieneko zerbitzurik ez ezartzea erabaki duela Enplegu Zuzendaritzak.
Arazoak sortuko dira, ziurrenera, astelehenean eta asteartean. 12 urtez azpiko umeek —haur hezkuntzakoek eta lehen hezkuntzakoek— ezin dute autobusean joan zaintzailerik gabe; hortik gorakoek, bai —DBH Derrigorrezko Bigarren Hezkuntzakoek—. Behin eskolara iritsita arazorik ez du espero Jaurlaritzak, irakasleei ez baitie eragingo lanuzteak.
