Euskal Herriko Eskubide Zibilen Aldeko Mugimenduak deituta, hainbat lagunek Iruñeko udaletxea inguratu dute gaur, eskubide zibilen defentsan. Herritarrok, gure eskubidea! Herritarrok, kalera! pankartarekin bildu dira hainbat pertsona Iruñeko Udaletxe plazan, eta deialdian adierazi zuten bezala, azkenaldian UPNren gobernuaren eskutik herritarrek jasan duten eskubide murrizketa salatu dute; beste batzuen artean, gaur Txantrea auzoan egitekoa zen kalderete lehiaketa.
Udaletxea inguratzearekin bat, Julieta Itoiz La chula potra kantariak Yolanda Barcinari eskaini dion abestia kantatu du. Iruñeko alkateak kereila jarri dio Itoizi, eta aste honetan epailearen aurrean izan badira ere, epaileak ez du oraingoz abestiaren aurkako neurririk hartu.
