«Eskuina geldiarazteko», boto erabilgarria aldarrikatu du PSE-EEk

Aurreikuspen guztiak kontra izan arren, azken unera arte borrokatzeko asmoa du PSE-EEk. Alfredo Perez Rubalcabak «ezustekoa» eman dezakeela uste du Iñaki Arriola Eusko Jaurlaritzako Garraio sailburuak. Hala azaldu zuen Miguel de los Toyos Eibarko alkatearekin eta Odon Elorza Espainiako Kongresurako Gipuzkoako zerrendaburuarekin batera Eibarren (Gipuzkoa) egindako ekitaldian.

Boto bakoitzaren garrantziaz jardun zen Arriola, eta boto erabilgarria aldarrikatu zuen ekitaldian: «Eskuina geldiarazteko boto erabilgarria alderdi sozialista bozkatzea da». Haren aburuz, abstentzioa «eskuinarentzako boza» da. PPk Espainiako Gorteetarako bozak irabaziz gero jendea baztertuko duen politikak erabiliko dituztela salatu zuen. PSOEk, berriz, «enplegua sustatu, eta hezkuntza, osasuna eta langileen eskubideak» defendatuko dituela.

Elorzak adierazi zuen ezkerreko bozaren «sakabanaketak» Mariano Raxoiri mesede egiten diola. PPren hautagaia presidente bihurtuz gero sozialisten lorpenak «piezaz pieza eraitsiko» dituela gaineratu zuen. Raxoirekin batera «betikoak» datozela ohartarazi zuen: « [Jose Maria] Aznar, Rouco Varela, banku handiak, haitzulo mediatikoa eta muturreko eskuina».

Egoera ekonomikoaren inguruan, urte «oso gogorrak» izan direla aitortu zuen Arriolak, baina Zapateroren gobernuak «erantzukizuna» hartu duela une horietan, eta PP, berriz, haiei errua botatzen ibili dela.