Espainiako gobernuburu Pedro Sanchezi hitza betetzeko eskatu dio Iñigo Urkullu lehendakariak, eta amai dezala 39 urteko itxaronaldia. Buruzagi jeltzaleak gogorarazi du Sanchezek onartu zuela badela aukerarik Gernikako Estatutuan jasotako 37 eskumenetatik 30 Jaurlaritzaren esku uzteko. Hori hala izanik, egutegi bat zehaztu dezala eskatu dio Madrili, nabarmenduta horrek "elkar ulertzea" erraztuko lukeela.
Bestalde eta estatutu berriari dagokionez, elkarrizketak bultzatu eta akordio zabalago bat lortzeko lan egiteko konpromisoa hartu du lehendakariak, testuak "EAEren nazio izaera" onar dezan eta erabakitzeko eskubidearen inguruko zalantzak argitu ditzan. "Akordioa zabaltzeak, elkarbizitza ahalbidetuko luke, ezeri uko egin beharrik gabe eta inposiziorik gabe".
Katalunia eta Espainiaren arteko gatazkari dagokionez, berriz, irtenbide adostuaren alde egin du Urkulluk, eta ohartarazi du ez dela gaizki egindakoez hitz egiteko garaia. "Instituzioen buruzagitza berreskuratzeko garaia da, irtenbide adostua nahi ez duten mugimendu pseudopolitikoei aurre egiteko".
