Espainiako Kongresuan Amaiurreko Iker Urbinak "presoen askatasunerako eskubidearen urraketaren apologia" egitea leporatu dio Barne ministroari. "Zure diskurtsoa duela 10 edo 20 urtekoa da. Ez duzu aintzat hartzen Euskal Herrian zabalik dagoen eszenatokia", esan dio.
Urbinaren arabera, presoen eskubideak, eskubideak diren heinean, ezin dira "baldintzaturik" egon, eta Fernandez Diazen jarrera "onartezina" dela iritzi dio. "Kode militarretan iltzaturik segitzen duzu eta Euskal Herrian bakea eta konponbidea nahi dugu".
Estrasburgok martxoaren 20an aztertuko du Ines del Rioren auzia. Del Rio aske uzteko eta kalte-ordainetan 30.000 euro emateko agindu zuen Giza Eskubideen Europako Auzitegiak uztailaren 11n, baina Espainiako Gobernuak ez zuen ebazpena bete, eta helegitea aurkeztu zuen joan den urriaren 4an. Hain zuzen, Madrilen helegitea onartu edo baztertu aztertuko du hurrengo astean.
