Espainiako Armadaren aire erakustaldiaren kontra agertu dira Gasteizko hainbat herritar

Andra Mari Zuriaren jaiak direla-eta, Espainiako Armadako Patrulla Aguila delakoak aire erakustaldia egingo du Gasteizen, abuztuaren 4an. Erabakia Alfonso Alonso alkateak hartu du. Erabaki horren kontra Gasteiz Desmilitarizatua plataforma agertu da, Gasteizko 50 erakunde sozial eta elkarte baino gehiagok osatua. Plataformak Alonso alkateari gogorarazi dio 1990ean Gasteizko Udaleko Osoko Bilkurak “udalerri esparruan edonolako ekitaldi edo parada militarrak saihesteko” mozioa aho batez onartu zuela.

Gaur Gasteiz Desmilitarizatua plataformak eskaini duen prentsaurrekoan alkatearen erabakia kritikatu dute, eta aire erakustaldiaren kontra agertu dira. Prentsaurrekoa Gasteizko hainbat herritar ezagunek eskaini dute. Jose Angel Cuerda alkate ohia, Bernardo Atxaga idazlea eta Mikel Urdangarin kantaria izan dira, besteak beste, agerraldian.

Plataformak azpimarratu du Patrulla Aguila -ren pilotuak ez direla “akrobata errugabeak” eta erakustaldietan ez daudenean C-101 gerra hegazkinen pilotu izango direnak trebatzea dela haien helburua, “erasorako izaera duten aireontzi hauek gudatan erabil ditzaten”

Patrulla Aguila -ren aire erakustaldiak Gasteizko jaietan militarren presentzia agertzeko helburua duela adierazi dute Gasteiz Desmilitarizatua plataformakoek, “hiritargoaren sentipenarekiko mesprezuzko erakustaldian”. Horregatik, jendeari “desmilitarizazio sozialaren alde” antolatuko diren ekimen eta mobilizaioetan parte hartzeko deia egin diote jendeari. Mobilizazio horietako bat uztailaren 31n antolatu duten manifestazioa izango da, Patrulla Aguila -ren aire erakustaldiaren kontra.