Parot doktrina eraistearen ondorioz askatu dituzten euskal herritarrei omenaldia egitea biktimentzat "umiliagarria" dela esan zuen Fernandez Diazek. "Ziur naiz Guardia Zibila edo Polizia balira, ez zela hori gertatuko", esan zuen, Ertzaintzak zuzen jokatu ote duen galdetuta. Beltran de Herediak berak komunikatu bat plazaratu zuen atzo esanez "nabarmenkeria" zirela Fernandez Diazen deklarazioak, eta Ertzaintzak "legea bete dadin lan egiten" duela. "Denok, PP barne, ados bagaude Ertzaintza Euskadiko polizia integrala dela, horren arabera jokatu behar genuke".
Iñigo Urkullu lehendakariak Mariano Rajoy Espainiako presidenteari eskatu dio azalpenak eman ditzala idatziz, eta horri erantzutera etorri da Fernandez Diazen barka eskea. Espainiako Gobernuak EAEn duen ordezkari Carlos Urkijok euskal preso ohiei egindako harrera horietako batzuk salatu zituen, eta esan zuen prest zegoela Ertzaintzari laguntzeko, gehiago gerta ez zitezen.
