Jorge Fernandez Diaz Barne ministroak eta Angel Yuste Espetxe erakundeetako zuzendariak azalpenak eman ditzatela eskatu du Amaiurreko Jon Iñarrituk Espainiako Kongresuan, Arkaitz Bellonen heriotza argitzeko. Iñarittuk gogoan izan du Bellonek "urteetan funtzionarioen jipoiak salatu" zituela, eta senideek istripua izan zutela hura ikustera joan zirenetako batean.
Espetxe politika "zaharkitu, krudel eta mendekuzkoa" dela salatu du, eta "baldintzak argitzeko" eskatu. 13 urte espetxean izan eta gero Bellonek isolatuta jarraitzen zuela azaldu du, espetxe onurarik izan gabe, eta etxetik mila kilometro baino gehiagora. "Sakabanaketa eta isolamendua zuzenean daude lotuta bere heriotzarekin",. Espetxe politika "amai dadila" eskatuz amaitu du esatekoa kongresuan.
GeroaBaiko Uxue Barkos diputatuak ere bi horien agerraldia eskatu zuen atzo.
