“Etxeratze bidean lege baliabideak” erabiliko zituela iragarri zuen EPPK Euskal Preso Politikoen Kolektiboak abenduaren 28an, eta urrats horiek zehaztu ditu BERRIAk bihar argitaratuko duen elkarrizketa batean.
Espainiako espetxeetan preso dauden EPPK-ko kideek Zaballako kartzelara lekualdatzeko eskaerak jarriko dituzte martxan; Frantziako presondegietan daudenek, berriz, Euskal Herritik gertuen dagoen kartzelan biltzea galdegingo dute. “EPPK subjektu aktiboa izateko, ezinbestekoa da kide guztiak espetxe berean egotea”, azaldu du presoen kolektiboak.
Sailkapen bat prestatu du EPPK-k eskaera horiek bideratzera begira: “Larriki gaixo direnen edota 70 urtetik gorakoak direnen kaleratzea ahalbideratuko lukeen eskaera egingo dugu”. Prozedura horretan “jarrera duinarekin” agertuko direla nabarmendu dute mintzaideek.
