"Posizionamendu politikoa gaurkotuz, akordioa izenpetzetik gaurdainoko ibilbidean prozesu politikoan sakonduz", presoen kolektiboak eginiko ekarpena nabarmendu du EPPK-k. "Zailtasunen gainetik, urtebetean egindako urratsak hor dira. Jarritako oinarriak jauzi berrietarako baldintzetan kokatzen gaitu".
Aldiz, Frantziako eta Espainiako gobernuek gatazken ondorioei heltzeko “inongo asmorik” ez dutela salatu du EPPK-k: "Espetxe politika blokeo politikoaren ardatz bilakatu nahi dute". Bi exekutiboek presoen sakabanaketa mantentzeko "aitzakiarik" ez dutela ohartarazi du kolektiboak, eta “marko legal antiterrorista eta bere ondorioak indargabetzea, auzi politikoak amaitzea” galdegin du.
Gainera, 2013an abiatuko dituen ekimenak iragarri ditu EPPK-k: abenduaren 29an barau eguna egingo dute espetxe guztietan sakabanaketarekin amaitu eta Euskal Herriratzea aldarrikatzeko. Urtarrilaren 12an, berriz, Bilbon deitua den mobilizazioaren egunean komunikazio greba egingo dute, bisita oro bertan behera utziz. “Senide eta lagunekin, herritarrekin, Bilbon izango gara”. Halaber, urtarriletik aurrera hileko hirugarren ostiralean Parot doktrinapean direnak berehala kaleratzeko eta kondizionalean daudenak ere kaleratzeko ekimenak abiatuko dituzte.
