Orain arte, erregistrora joan eta elizgizon baten agiria aurkeztea aski izan du Elizak eraikinak bereganatzeko. Funtzionario baten egiaztagiriak adinako balioa zeukan Elizako ordezkariarenak. Nafarroan sortu du zalaparta handiena, Iruñeko Artzapezpikutzak mila ondasun baino gehiago bereganatu baititu 1998. urtetik 2007. urtera. Elizaren argudioa da "betidanik" izan direla bereak elizak eta bidezkoa dela bere izenean jartzea.
Espainiako Gobernuak, baina, hipoteka legea aldatzeko aurreproiektua aurkeztu du, eta Elizak galdu egingo du urteetan erabili duen abantaila hori. Justizia Ministerioak aitortu du Elizak "egoera aski berezia" zuela legean, eta homogeneizatzera joko duela. Aurrerantzean, Elizak ohiko prozedura baliatu beharko du, eta jabetza guztiak frogatu beharko ditu, beste edozein pertsonak bezala.
Aurreproiektua "pozez" hartu du Nafarroako Ondarearen Defentsarako Plataformak. "Izugarrizko garaipena" dela adierazi du plataformako presidente Carlos Armendarizek, urteetan zehar salaketak jartzen ibili ondotik, arrazoia eman dietelakoan. Halere, ez da erabat ase, eta nabarmendu du PPren gobernuak Elizaren jokabidea "konstituzioaren kontrakoa" izan dela onartu arte "tinko" jarraituko dutela lanean. Itxaropentsu mintzo da, uste baitu, gobernuak aitortza hori eginez gero, Elizak bereganatutako ondasunak berreskuratzea posible litzatekeela. Dena dela, "zail" ikusten du PP agintean dagoen bitartean halakorik gertatzea. Armendarizek salatu du gobernuak Eliza katolikoaren pribilegioak mantentzeko borondatea duela, eta horretarako "erraztasunak" eskaintzen dizkiola.
