“Zigor zuzenbidearen aplikazio krudela eta gizagabea da” 197/2006 doktrina. Ondorio horretara iritsi dira Espainiako Kongresuan eta Senatuan ordezkaritza duten IU, CIU, Amaiur, Geroa Bai, ICV, Equo eta EAJ alderdietako berrogeitik gora ordezkarik, hori arrazoitzen duten argudioak eman ondoren. Nazio Batuen Erakundeko giza eskubideen goi mandatari Nils Muiznieksi bidali diote idatzia, jakinaraziz doktrina horrek irizpide politikoei erantzuten diela juridikoei baino gehiago, eta espresuki salatu dute Espainiako Auzitegi Konstituzionalak doktrinari ematen dion babesa, euskal presoei doktrina aplikatzeko hartu dituen erabakietan oinarrituta.
Konstituzionalaren jarrerak agerian uzten du, manifestuaren arabera, erabaki judizialek “izaera erabat politikoarekin” duten lotura, eta legeriak dituen irizpideen “desbideratzea”, gizarteratzeko irizpideak izan ordez, “zigortzeko, eredua emateko, edota mendekatzeko” arrazoietan oinarritzen direlako erabakiok.
Presoaren sufrimenduaz
Doktrinaren aplikazioak presoari sortzen dion sufrimenduaz ere ari dira testuan: “Zigorra betez doan bitartean, aske geratzeko itxaropena eratzen doan heinean, ziurgabetasunari atea zabaltzen dio”.
