Uztailaren 1etik aurrera indarrean egongo dira Espainiako Zigor Kodearen erreforma, Espainiako Herritarren Segurtasun Legea eta "terrorismo" jihadistaren aurkako araudi berria. Alderdi popularrak aldaketa horiek guztiak onartu ditu Espainiako Kogresuan.
Oposizioko alderdi guztiek gogor kritikatu dituzte lege aldaketak, eta horietako zenbait puntu Espainiako Konstituzioaren aurkakoak direla nabarmendu dute. Hain zuzen ere, alderdi batzuek jakinarazi dute Zigor Kodearen aldaketaren aurkako helegitea aurkeztuko dutela.
Herritarren Segurtasunerako Legeari kritikak egin dizkiote parlamentutik kanpo ere. Amnistia Internazionalak salatu du Espainiako Gobernuaren egitasmoak gizabanakoen askatasunak mugatzen dituela eta "immigranteen aurkako neurriz kanpoko praktikak formalizatzen" dituela. "Giza eskubideen oinarrizko bermeak" murrizten dituela ere ohartarazi du Gauri Van Gulik AIko Europako zuzendariordeak.
PPren botoekin soilik onartu dira Zigor Kodearen erreforma eta Espainiako Herritarren Segurtasunerako Legea. Terrorismo jihadistaren aurkako araudi berriak, PSOErekin adostutakoak, bi alderdi horien babesa izan du.
Lege aldaketa horien bitartez, bizi guztiko espetxe zigorra onartu du, besteak beste. Gizarteak kalean egiten dituen protesta moten gaineko kontrola areagotuko dute, baldintzak zorroztu, baita protesta horien berri emateko askatasuna urritu ere.
