Faisan auziaren harira egin du adierazpena Espainiako SUP Poliziaren sindikatuko kideak. Torres Dulce Espainiako fiskalburuak auzi horretako bi poliziaburu auzipetzeko eskatu du, ETArekin kolaboratzeagatik, eta Sanchez Fornetek hori izugarrikeria litzatekeela adierazi du. Hori azaltzerakoan esan du "Frantzia hegoaldean" legez kanpoko operazioak egin direla.
"Pamies komisarioak eta Ballesteros inspektoreak duten ibilbidearekin hori leporatu ahal bazaie, horrek bultzatuko ditu egiten ari diren sakrifizioak ez egitera, eta kontatzera Frantzia hegoaldean terrorismoa amaitzeko egin diren legez kanpoko operazioak, gobernuan bai PP bai PSOE zeudenean", adierazi du SUP sindikatuko kideak. Sanchez Fornet sindikatuko idazkari nagusi izandakoa da.
