Bakea "egonkortzeko", Espainiako Gobernuak "serioago" hartu behar du espetxe politiken eskumena Eusko Jaurlaritzaren esku uzteko aukera. Hori esan du gaur Josu Erkoreka Eusko Jaurlaritzako bozeramaileak. Haren ustez, hori eginez gero, administrazio guztiak "elkarlanean" aritu daitezke lanean "giroa lasaitu" eta "bakea egonkortzeko".
Onda Vascan elkarrizketatu dute Erkoreka. Bertan azaldu du espetxe politika Jaurlaritzaren esku uztea eskaera "historikoa" dela eta exekutiboak horretarako tresnak bilatuko dituela. Erkorekak esan du orain arte "beti erantzun berdina" jaso dutela, eta horretan ez dagoela ezberdintasunik PPren eta PSOEren artean: "Hemen esaten dutena esaten dutela, euren Madrileko nagusiak kontra azaldu dira sistematikoki". Espainiako Gobernuak "era guztietako argudioak" eman ditu eskumena Jaurlaritzaren esku ez uzteko, Erkorekaren esanetan. Egungo egoera, ETAk jardun armatua behin betiko utzita, "ezberdina" dela defendatu du Jaurlaritzako eledunak.
Gainera, Erkorekak esan du Eusko Jaurlaritzak dagozkion eskumenak defendatuko dituela, bereziki "oinarrizko zerbitzu publikoei" lotutakoak. Izan ere, uste du PPk krisi ekonomikoa baliatu nahi duela eskumenak "berzentralizatzeko".
