Joru Erkoreka Eusko Jaurlaritzako eledunaren ustez, duela lau urte ETAk emaniko urratsa aldebakarrekoa izan zen bezala, aurrerantzeko pausoek ere halakoak behar dute izan, batik bat, armagabetzeari dagokionean. Hala ere, esan du azken lau urteotako egoera hobea izango zela baldin eta Espainiako Gobernuak espetxe politika aldatu izan balu. Honezkero, aldatzekotan, abenduko hauteskundeen ondotik osatuko den Espainiako Gobernu berriak aldatuko duela adierazi du.
Ildo beretik mintzatu da Uxue Barkos Nafarroako lehendakaria ETAren jardun armatuaren amaierari buruz galdegin diotenean. Euskal presoen afera ekarri du gogora, eta espetxe politika egokiago baten alde agertu da.
