44 orrialdeko ponentzia eztabaidatu dute Herrira-ko herri bilguneetako 250 bat lagunek, Irungo Ficoban. Euskal presoen eskubideen alde urtarrilaren 12an Bilbon egin zuten manifestazio handiaren ondoren, helburuak eta lehentasunak zehaztu, ahulgune eta gaitasunak identifikatu eta aurrera bidean nola lan egin erabakitzeko.
Mugimendu parte hartzailea izateko helburua du Herrira-k. Ponentziari aurkeztutako emendakinak azaldu, eztabaidatu eta bozkatu dituzte. Fran Baldak azaldu duenez, gaur baino lehenago ere parte hartu dute Herrira nilguneetako kideek, ponentzia osatzeko lan bilerak egin dituztelako, emendakinak aurkezu eta abar —berrehun Herrira bilgune baino gehiago osatu dira—. Bilboko manifestazioan izan zen jendeak mezu bat eman nahi izan ziela uste dute: presoen eskubideen aldeko manifestazio erraldoian ikusi zen jendetza antolatzea. Horretan saiatuko dira.
"Gure mugimenduari dagokionez, hauxe da gure asmoa: giza eskubideen, gatazkaren konponbidearen eta bakearen pankartari ekarpen eta konpromiso gehiago gehitzea. Horretarako, herritarrekin batean jarraitu behar dugu lanean, eragile politiko, sindikal eta sozialekin, eta, orain, hauxe da gure eginkizuna: Bilboko kaleetako indar eta ilusio hura herri, hiri eta auzo guztietara eramatea", adierazi du Baldak Irunen, hedabideen aurrean.
Ponentzian jasotzen denez, helburu argiak ditu Herrira-k hasi berri den urterako. "Salbuespen neurriak gainditze aldera akordio sozial berri bat artikulatzea", eta neurri horiek amaitzeko "[Espainiako eta Frantziako] gobernuei presioa egitea", besteak beste. Horretarako, mugimendua indartu eta hedatu nahi dute. "Mugimendu zabala, irekia, parte hartzailea, dinamikoa, herritarra, berritzailea, eraginkorra, anitza eta elkartasunezkoa" eratu nahi dute.
