Otsailaren 20rako "espetxe guztietara" joateko martxak antolatzen ari da ezker abertzalea, Euskal Herria abian, presoak etxera lelopean, sare sozialen bidez jakinarazi duenez. Bihar agerraldia egingo du Donostian, Abian eztabaida prozesuaren lehen fasearen balantzea egiteko, eta bertan emango dute mobilizazioen zehaztasunen berri.
Bihar mobilizazio handi baten berri emango dugu. Adi egon! #presoaketxera#abianpic.twitter.com/HLprdRzc0L
— Ezker Abertzalea (@ezkerabertzalea) January 22, 2016Iazko abenduaren 27an, Martuteneko espetxera egin zuten martxa, Sortuk deituta. Askatasunaren bidean, euskal preso politikoak etxera lelopean, hainbat lagunek hartu zuten parte Donostiatik zein Hernanitik abiatu ziren bi giza kateetan.
Lelo horrekin, hitzaldia eman zuen Rufi Etxeberria Sortuko Gatazkaren Konponbiderako ordezkariak Iruñean joan den astean. Esan zuen "salbuespeneko" zigor, espetxe eta auzibide politika legedi "arruntera" itzuli beharra dagoela, baina alor juridikoan "ekimena" euskal presoek hartu beharraz ere mintzatu zen. "Ausardiaz jokatzeko garaia da. Euskal presoen kolektiboak eremu juridikoan ere ausart jokatzeko urratsa egin beharko luke, egin beharreko ibilbidea ekimena hartuz eginez, betiere damuaren eta salaketaren marrak alboratuz", adierazi zuen.
