Ostiral goizaldean gertatu zen ezbeharra, Iruñean: 32 urteko gizonezko bat semaforoa duen zebra bide bat gurutzatzen ari zen auto batek harrapatu zuenean. Kolpeak 80 metrora jaurti zuen biktima, Udaltzaingoaren arabera, eta hil egin zuen. Ibilgailua ez zen gelditu harrapaturiko pertsonari laguntza emateko. Udaltzainek gidaria eta harekin zihoan pertsona bat aurkitu zituzten, Sanduzelain auzoan, Arga ibaiaren ondoan, ihes egiten saiatzen ari zirela, udaltzainen arabera. Gidariak 26 urte ditu.
Gaur goizean igaro da akusatua 4. Instrukzio Auzitegiko epailearen aurretik, eta hura baldintzarik gabe espetxeratzeko agindu du. Epaileak giza hilketa delitu bat egotzi dio, alkoholaren eta drogen eraginpean gidatzea, eta istripu lekutik ihes egitea biktimari laguntza eman gabe.
Autoak aipatzen duenez, U.S.V ikertuak, edari alkoholdunez gain, kokaina eta estasi drogen eraginpean abiadura handian ari zen gidatzen. Udaltzainak segika hasi zitzaizkion. Gorrian zen semaforoa errespetatu gabe, 100 kilometro orduko abiadura iragan zen Baiona etorbidetik, eta Pablo Salinas oinezkoa harrapatu zuen. Berehala hil zela egiaztatu du epaileak. Gidaria autoa utzi eta ezkutatu egin zen Sanduzelain, «Gipuzkoa etorbideko landaredi artean. Bertan topatu zuen Udaltzaingoaren beste talde batek».
Egotzitako delituen zantzuen inguruan, udaltzainen eta hainbat herritarren lekukotasunak egiaztatzen dute abiadura handian gidatzen ari zela, eta tokiko kameren irudietan ere hala ageri da. «Gertakarien larritasunaren aurrean, eta aurrerago jaso dezakeen zigorraren ondorioz ihes egiteko arriskua delako», guardia epaileak behin-behineko espetxealdia ezarri dio ikertuari. Larritasuna azpimarratzerako orduan, epaileak dio, istripua gertatu zen tokitik ihes egiteaz gain, autoa utzi egin zuela ezkutatzeko, «atxiloketa saihesteko asmoz».
