Uztailaren 22an argitaratu zuen Eusko Jaurlaritzak paperik gabe edota asegurorik gabe dauden pertsonak artatzeko erabakia buletin ofizialean. Araban, Bizkaian edo Gipuzkoan gutxienez urtebete erroldatuta egonez gero, Osakidetzako txartel baterako eskubidea eta mediku bat izateko eskubidea bermatzen die, beti ere gutxieneko errenta bat baino gutxiago jasoz gero.
Iñaki Berraondo Osasun Saileko zuzendarietako batek gaur Eusko Legebiltzarreko Osasun batzordean esan du 700 direla baldintza horiek betetzen ez dituztenak. Horiei larrialdietako zerbitzua eskaintzen zaie soilik, osasun publiko arazo diren salbuespen kasuez gain. Haurdun dauden emakumeak eta adingabekoek ere bermatzen zaie artatuak izateko eskubidea.
EH Bilduk Jon Darpon Osasun sailburuaren agerraldia eskatu zuen gaurko Legebiltzarrean, baina Berraondo izan da bere partez. Hor jakinarazi du Estatuaren abokatuak helegitea aurkeztu duela. EH Bilduk, PSE-EEk eta UPDk doako zerbitzu unibertsala defendatu dute Legebiltzarrean, eta eskubidea herritar guztiei bermatzeko arauak dituen baldintzak kentzeko eskatu dute.
Eva Blanco EH Bilduko parlamentariak esan du gogortu egin direla baldintzak, eta atzerritar askok etxe bat erosteko eta erroldatzeko dituzten arazoak nabarmendu ditu. Iñigo Lamarca arartekoak ere zerbitzu unibertsala bermatzeko eskatu zuela gogorarazi du.
