Espainiako eta Frantziako estatuen indarkerien biktimek gatazkari "konponbide demokratikoa" ematekoa "egia osoa" aldarrikatu dute gaur, Bilbon egindako agerraldian. Bermeak izatearen garrantzia azpimarratu dute, atzera "injustiziak" ez egoteko.
"Ez gatoz dirua eta mendekua eskatzera; konponbide demokratikoa eskatzera gatoz", esan dute haien izenean Carmen Galdeanok —Xabier Galdeano kazetariaren alabak; GALek hil zuen hura— eta Idoia Muruagak —Igor Angulo presoaren neska-lagun izandakoak; kartzelan zendu zen Angulo—. GALek, poliziek, torturek, gerra zikinak, armadak edota "kartzela politikak" hildako lagunen senideak-eta agertu dira prentsaurrekora.
ETAk urriaren 20an borroka armatua bukatu duela iragarri zuen arren, estatuen biktimek azpimarratu dute indarkeria ez dela amaitu. "Polizia etxeetan eta kartzeletan eskubide urraketak geratzen dira".
Biktimen beste elkarteei esan diete "modu positiboan" aritzeko eta prozesuan "eragozpenik" ez jartzeko. "Bestearekiko eta eskubideekiko errespetuan oinarritutako bizikidetza lortzea da gure helburua".
