EH Bilduren ustez, hastear den urte politikoa "erabakigarria" izango da Araba, Bizkaia eta Gipuzkoako estatus politiko berria zehazteko, eta ezinbestekoa deritzo eztabaida horri "abiapuntu politikoa sendoa" jartzeari. Helburu horrekin, koalizioak legez besteko bi proposamen aurkeztu ditu, gaur bertan Mahaiak tramitera onartuko dituenak. EH Bilduko eledun Maddalen Iriarteren iritziz, estatus politiko berriaren eztabaidaren ardatza erabakitzeko eskubidea izango da: "Demokrazia ala inboluzioa da benetan jokoan daukaguna". Iriartek azaldu duenez, eztabaida horri behar bezala heltzeko "interferentziak" ezabatu behar dira, eta argi dago Gernikako Estatutua ez betetzea "interferentzia handia" dela. Horregatik, hori saihesteko eta estatus berriari "abiapuntu sendoa" emateko, EH Bilduk Espainiako Gobernuari eskatu dio bi hilabeteko epean Estatutua osorik betetzeko programa eta egutegia bidaltzeko. "Estatutua betetzea obligazioa da, baina baita gutxieneko bermea estatus politiko berria eztabaidatu eta adostu ahal izateko ere", azpimarratu du Iriartek.
Bigarren legez besteko proposamenarekin, "urrats" bat harago joan nahi du EH Bilduk, Pello Urizar legebiltzarkideak azaldu duenez. Koalizioak uste du eztabaida horren baitan beharrezkoa dela Espainiako Estatuari "errespetu eta berme demokratikoak eskatzea". Hala, estatus politiko berriaren oinarriak adosteari ekin aurretik, EH Bilduren asmoa da legebiltzarrak konpromisoa hartzea estatus berriak "berme demokratiko guztiak" izango dituela, eta ondorioz, Espainiari eskatuko dio legebiltzarretik aterako den akordioa "demokratikoki" errespetatu dezan.
Bi proposamen horiekin EH Bilduk talde guztiei dei egin nahi die "demokrazian murgiltzera" eta denen artean "berme sistema bat" ezartzera, legebiltzarrak onartuko duena beteko dela ziurtatzeko.
