Estrasburgoko epaileek aho batez ezetsi dute Filipe Bidarten salaketa. Epaileen esanetan ez da urratu adierazpen askatasuna Bidarten baldintzapeko askatasuna emateko ezarri zioten baldintzarekin. Baldintza horietako bat zen zigortua izan zen gaiei buruz ez hitz egitekoa.
Epaileek nabarmendu dute debekua aldi baterako zela, hau da, baldintzapeko askatasuna amaitu arte. Diote Iparretarrak erakundeko kide eta preso ohiak baduela “euskal auziaz” hitz egiteko eskubidea.
1988an sartu zuten preso Filipe Bidart eta hainbat aldiz baldintzapean aske uztea errefusatu ondoan, 2007an eman zioten kalera ateratzeko baimena. Ordutik Beziers hirian bizi izan zen harik eta 2012ko maiatzean Euskal Herrira itzultzeko baimena jaso zuen arte. Baigorri herrira (Nafarroa Beherea) itzuli zen, eta han, hogeita bi hilabetez egon zen baldintzapean aske.
