Mondragon Unibertsitateko Humaninate eta Hezkuntza Zientzien (HUHEZI) fakultateak gonbidaturik, Iñigo Iruin abokatuak eta Rufi Etxeberria ezker abertzaleko kideak hitzaldia eman dute gaur 14:00etan, Eskoriatzan (Gipuzkoa). BERRIA.INFOk zuzenean eman du lehen zatia, irekia zena; bigarrena, ikasleentzat zen soilik. Paradigma da hitzaldiaren izenburua.
Rufi Etxeberriak hartu du hitza, eta Espainiako eta Frantziako estrategia "asimilazionistek" porrot egin dutela salatu du, "bai eredu autonomikoa baita Ipar Euskal Herrian ezarri duten politika chauvinista". Espainiak ez duela Euskal Herriarentzat eskaintzarik gaineratu du, eta gatazka denboran luzatzea duela helburu bakar, "horrek fruitua emango dielakoan".
Bi ardatz: nazio aitortza eta erabakitzeko eskubidea
Espainian nazio aitortza eta erabakitzeko eskubidea hurrengo urteetako borroka izango direla adierazi du Etxeberriak, eta Euskal Herria ez dela horretan bakarrik egongo, Kataluniarekin eta Galiziarekin batera indarrak bateratu behar direla esan du.
Etxeberriaren hitzetan "errealitate berriak" irekitzeko baldintzak badaude: "Herri hau sakonekoa aldaketa politiko eta sozialean sartuta dago". Ezker abertzaleak nazio aitortzaz eta erabakitzeko eskubideaz gain, estatu propio bat izateko eskaera eskaintzen duela esan du ezker abertzaleko kideak, "behetik gora".
