Urriaren 12an atzeman zuten armategi bat Frantziako Poliziak eta Guardia Zibilak, eta Jorge Fernandez Diaz Espainiako jarduneko Barne ministroak adierazi zuen dozenaka arma topatu zituztela han. ETAk, ordea, zehaztu du "denbora asko" dela erakundeko inor ez zela hara joaten: "Indar polizialek ez dute ETAren zulo bat desegin, ETAren kontra prestatutako tranpa bat baizik".
Azaldu duenez, ETA saiatu izan da kontrol segururik gabeko gordelekuei aterabide egoki bat ematen, "armagabetze prozesuaren zain egon gabe". Gainera, uste du ildo horretan mugimendurik egon zitekeela-eta azkenaldian zabaldu diren zurrumurruek "kezka" sortu dutela "garaituen eta garaileen" eskema inposatu nahi dutenen artean. Horrela, operazio horren bitartez, "hedabideetan izandako zenbait filtrazioren ondotik, mezu argia zabaldu nahi izan dute: inork ez dezala mugimendu txikiena ere egin arrazoizko soluzio bila", ETAren iritziz.
Urriaren 12ko operazioaren ondotik zabaldutako informazioak "gezurrez eta intoxikazioz beterik" daudela erantsi du, "Espainiako Barne ministroak propaganda egiten segitu nahi duelako". Halaber, "horrelako gertaeren eta jokabideen larritasunaz" ohartarazi du, "interes politikoak herritarren segurtasunaren gainetik jartzen baitira". "Sinesgaitza" iruditzen zaio Frantziako Gobernua "bere lurraldean horrela aritzea".
Bestalde, herritarrei "gobernuen arduragabekeriaz" ohartarazi die, eta mezua igorri die gatazkaren ondorioak gainditzeko eta armagabetzean laguntzeko prest dauden eragileei: "Gure konpromiso guztiak betetzen saiatuko garela eta berriak ere hartuko ditugula. ETAren hitza dute".
