Etxe kaleratzeak eta gehiegizko zorpetzea saihesteko "beharrezkoak diren lege aldaketak" egiteko eskatu dio Nafarroako Parlamentuak Espainiako Gobernuari. Hipoteken eta Prozedura Zibilaren legeez gain, beste batzuk ere moldatzea galdegin du: hipoteken merkatua arautzen duen legea, finantza erakundeen esku hartzea eta diziplina arautzen duena eta hipoteka maileguen aldaketak eta subrogazioak arautzen dituena, hain zuzen.
Halaber, erreforma horien beharraz Madril ohartaraztea adostu du Nafarroako Parlamentuko Ekonomia Batzordeak. Mozio baten bidez egingo diote eskari hori Espainiako Gobernuari, eta PSNk sustatu du mozioa. Zordunen eta hartzekodunen arteko "desoreka zuzendu" nahi du PSNk.