Espainiako altxamendutik 80 urte beteko direla baliatuta, memoria historikoaren alde lanean ari diren elkarteak eta, bereziki, Paco Etxeberria antropologoa omenduko ditu Nafarroako Gobernuak, irailaren 21ean. Bakearen Nazioarteko Eguna ere badela baliatua, Tuteran egingo dute ekitaldia, Castel-Ruiz eraikinean, eta bertan izango dira, besteak beste, Uxue Barkos presidentea eta Eneko Larrarte alkatea.
Harreman Instituzionaletarako kontseilari Ana Olloren arabera, bakean eta elkarbizitzan aurrera egiteko hartutako konpromisoarekin bat dator ekimena. Lehen aldia da Nafarroako Gobernuak halako ekitaldi bat antolatzen duena, baina, Ollok berak iragarri duenez, urtero egitea da helburua.
