Osoko bilkuran behin betiko onartuko duten testuari oniritzia eman zion maiatz amaieran Eusko Legebiltzarreko Etxebizitza Batzordeak.
EH Bilduk, PSEk eta UPDk konpromisoa azaldu zuten legea aurrera ateratzeko, baina hirurek hainbat zuzenketa gorde zituzten osoko bilkuran bozkatzeko. Beitialarrangoitiak, besteak beste, etxebizitza duinerako eskubidea aitortzeko baldintzen "ikuspegi zabalagoa" izateko zuzenketak aurkeztuko ditu: "Ordaindu beharreko alokairua ezin da, kasuaren arabera, diru sarreren %15 edo %30 baino gehiago izan; hortik gora ordaindu behar dutenei ere aitortu behar diegu etxebizitza duinerako eskubidea". Halaber, etxebizitza hutsen gaineko tasa ezartzen hasteko epea laburtzearen alde agertu zen. Legean bi urteko epea zehaztu dute; EH Bilduk sei hilabete proposatu ditu.
Maneiro prest agertu zen beste taldeen zuzenketak negoziatzeko, baldin eta "marra gorri batzuk" errespetatzen badituzte: etxebizitza duinerako eskubide subjektiboa eta alokairuaren aldeko apustua. "Hori errespetatuta, akordioak lortzeko irekita gaude".
PSE-EEk, lege proiektua abiarazi zuen alderdia izan bada ere —aurreko legegintzaldiko testua aurkeztu zuen—, zenbait zuzenketa gorde ditu; hutsik dauden etxebizitzen errolda egitea, besteak beste.
