Gasteizko Etxebizitza Sindikatuak eta Erraki Langileen Kontrolpeko Babes Sareak etxegabetze bat salatu dute, «desokupazio enpresa batek» Abetxuko auzoan (Gasteiz) aurrera eraman zuena. Familia bat Banco Popularrena zen etxebizitza batean bizi izan zen lau urtez, eta kaleratu egin zuten.
Sindikatuaren esanetan, familia bizi zen etxebizitza bankuaren jabetza zen, eta «putre funts batena» bihurtu zen duela hainbat hilabete: «Putre funtsak desokupazio enpresa bat kontratatu zuen, eta, apirilean, etxebizitzan agertu ziren, sarrailagile batekin, etxebizitzaren sarraila aldatzeko asmoz. Inolako agindu judizialik gabe, etxegabetzea modu ilegalean gauzatu nahi izan zutela azpimarratu nahi dugu». Azaldu dutenez, bertan jendea bizi zelako «proba argiak» zituzten bai etxebizitzaren jabeek eta bai administrazioak eta udaltzainek, eta «erroldak eta polizien bisita etengabeek» berresten dute hori.
Kasuaren aurrekariak ere esplikatu nahi izan dituzte. Hain zuzen, ekainean, desokupazio enpresako gizon bi eta abokatu bat joan zitzaizkien etxe horretako bizilagunei, eta eskaintza ekonomiko bat egin zieten handik joatearen truke. Egoera «jasanezin» horretan, familiak etxea hustu zuen; ezetz esanez gero zer gerta zitekeen «beldur». Uztailaren hasieran, familiak etxea utzi behar izan zuen: «Guk, azken egunetan izan dugu gertatutakoaren berri».
Aholku gida
Etxebizitza Sindikatuak eta Errakik «antolakuntzaren beharra» azpimarratu dute. Eta horretarako, «ekarpena egiteko asmoz», batetik, desokupazio enpresen aurka eman beharreko pausoak azaltzen dituen gida bat aurkeztu dute, eta, bestetik, haiekin harremanetan jartzeko deia egin diete horrelako egoera batean bizi diren familia, eragile eta norbanakoei.
📑Bide horretan, desokupazio enpresen aurrean egin beharrekoak azaltzen dituen gida aurkezten dugu; eta horrelako egoera bizi duten guztiei gurekin kontaktuan jartzeko dei egiten dugu.
— Etxebizitza Sindikatua (@EtxeSindikatua) July 28, 2021
🔴Desokupazio enpresa faxistak kanpora!
🔴Langile kontrolpeko espazioak aurrera! pic.twitter.com/hQpesRGf0c
