Etxerat-ek ostiralean egingo du gaixotasun larri eta sendaezinak dituzten presoen inguruko Gaitz isilduak dokumentalaren aurkezpena. Donostiako Koldo Mitxelena Kulturguneko areto nagusian izango da, eguerdiko 12:00etan.
Gaixotasun larri eta sendaezinak dituzten hamalau presoren senideen testigantzekin osatu dute filma. "Hamalau gaixotasun, hamalau egoera, hamalau bizipen", Etxeratek ohar baten bidez adierazi duenez. Gaixotasun larri eta sendaezinak dituzten arren, espetxean jarraitzen duten presoak dira denak. "Hamalau kasu hauetan presoen oinarrizko eskubideak urratuak izaten ari direla ikusten da, eta senideek egoera hauen aurrean sentitzen duten ezintasuna sentitu daiteke", zehaztu dute.
