Etxebizitzarik gabeko pertsonen egoera genero ikuspuntutik aztertu dute Emakundek eta SiiS Ikerketa eta Dokumentazio Zentroak. Gaur aurkeztu dituzte txostena eta ondorio nagusiak Izaskun Landaida Emakundeko zuzendariak eta Joseba Zalakain SiiSen zuzendariak. Nabarmendu dute ikerketetan emakumeen presentzia gutxitzeko joera izan dela, eta bazterketa jasaten duten emakumeak gehiago direla, nahiz eta ikusezinagoak izan.
Emakumeek ikerketetan daukaten presentzia hainbat kausarekin lotu dute: gizonezkoen esperientziak erreferentzia hartuta analizatzeko joera; definizio murriztaileak erabiltzea, hau da, etxerik ez izatea gaua kalean edo aterpeetan igarotzearekin lotzea soilik; eta etxegabetasuna ezkutatzeko joera, emakumeen kasuan, zehazki.
Kasu horien ikusezintasuna ere ikerketako ondorio nagusietako bat da. Emakumeen kasuak agerian ez egotearekin lotzen dute. Hots, ez direla kalean edo aterpetxeetan bizi. Senideren edo lagunen baten etxean lo egiten dute, edo ostatua zaintza zerbitzuen truke lortzen; baita bikote harreman gatazkatsu batekin jarraitu ere, etxe gabe ez gelditzeko.
