Etxetik botatzearen aurka talde bat sortu dute hainbat eragilek Gipuzkoan

Hipoteka ordaindu ezin dutela-eta etxetik kanporatzen dituztenen egoera salatzeko, elkarte bat sortu dute Gipuzkoan. Kanporatze horiek etetea izango du xede nagusietakoa. Elkartea sortu duten taldeen artean daude, besteak beste, M-15 mugimendua, Benetako Demokrazia Orain eta Kepasakonlakasa.

Elkarteko kideek salatu dute egunean lau kanporatze izaten direla Araba, Bizkai eta Gipuzkoan. Hala, banku, aurrezki kutxa eta epaileen jarrera salatu dute, batez ere. «Inongo zalantzarik izan gabe, jendea etxetik kanpo uzten dute, eta bizi osorako zor baten zamarekin». Hala, etxe eskubidea aldarrikatzeko, manifestazio bat egingo dute igandean Donostian. Protesta 18:00etan hasiko da, Bulebarrean. Etxebizitza duin baten alde, alquiler social ya izango da leloa. Manifestazioarekin bat egin dute Plataforma Antikapitalistak, CNTk, Euskadiko Gazteriaren Kontseiluak eta Malen Etxea elkarteak.